الأحد، 1 أغسطس 2010

...من مذكرات مريض نفسي: ...قولي مبروووك ، و بردوا مفيش حاجة ساقعة#links#links

حمرا

امبارح وانا قاعدة ومش لاقية حاجة اعملها قولت اتفرج على التليفزيون مسكت الريموت وقعدت اقلب فى القنوات كل قناة بتفرج عليها الاقى اعلان لمسلسل حيجى فى رمضان وهنا دخلت فى حالة ازبهلال ايه كمية المسلسلات دى ومفيش اعلان واحد يوحد ربنا عن برنامج دينى وكان رمضان حلف ستين يمين ما حيجى يزورنا الا لما يكون فى مسلسلات وكلها مسلسلات ايه موووووز والناس كلها قالعة اصلهم معذورين يا جماعة ما رمضان حيجى فى الحر صيف يعنى والصيف بيحب البلبطة والمسلسلات كلها بتتكلم عن المخدرات او عن الجواز اللى اتجوزت اكتر من واحد واللى اتجوز اكتر من واحدة ....ومفيش كلام بقى على ان رمضان ده شهر القران والصلاة والقرب لربنا عشان يغفر لنا البلاوى اللى عملناها طول السنة حسيت فجاءة انى محتاجة حد يخبطنى على نفوخى وانى مش فى مصر....أستغفر الله العظيم فى ايه يا اخوانا أتقوا الله فينا وكان الممثلين دول واخدين رمضان ده سبوبة واهو يطلعولهم فيه بقرشين طب والنبى مش حرام المليارات اللى اتصرفت على المسلسلات دى مش كانوا الشباب أولى بيها كانوا عملوا للشباب دى مساكن يتجوزوا فيها بدل ما يعنسوا ولا ياكلوا الغلابة اللى مش لاقين والله حرام عليهم أنا متغاظة قوى يا عالم أعملوا حاجة تنفعكم لاخرتكم هوه أنتم خلاص مبقاش عندكم دم خالص ايه كمية الاستفزاز دى والله لكشف راسى وادعى عليكم دعوة ربنا ينتقم منكم بحق كل شاب فى البلد دى محتاج ومش لاقى وبحق كل بنت حتعنس وبتحب شاب ومش عارفين يتلموا فى بيت بسبب الغلاء اللى عايشين فيه وأنتم عاملين تلموا فلوس من التفاهة وتصرفوها فى الهلس نفسى أعمل حملة لمقاطعة المسلسلات دى والقنوات اللى حتعرض القرف ده لو أقدر بجديمكن يخلوا عندهم دم ويحسوا واللى وزد الطين بلة وانا بقلب لاقيت اعلان عن برنامج اسمه(حمرا)اةةةة حمرا مستهيالى كدة ان حمرا دى كلمة مش ولابد برضه وبتتقال باين كدة لما حد يغلط فى حد بس هوه فى واحد بس فى جونينة الحيوان اللى عنده حتة حمرا مش كدة برضه ولا انا غلطانة حتى القباحة وصلت البرامج يا جدعان واللى بيقدمه واحد معارض ودايما مش عجبه حاجة فى البلد اللى عاوزة افهمه هوه بيقول حمرا لمين بالظبط؟وانتم لو حتقولوا حمرا حتقولوها لمين؟..........أنا بقى عارفة حقولها لمين !حسبى الله ونعم الوكيل فى اللى عاوزين يغيبونا واللى عذبونا واللى مسخونا واللى عاوزين يخلونا بعيد عن الدين وعن ربنا حتى فى الشهر الكريم واللى بيلهونا علشان ينسونا اللى عملوه فينا .....كفاية بقى رقص وهلس تعبتونا من كتر التطبيل تعبتونا وياريت ترحمونا وتحلوا عننا وحمرااااااااا والف حمرااااااااا

كلمات لها معانى

  • عندما نحب شخص ونثق فيه ونعتقد انه يبادلنا نفس الشعور ثم نتفاجا أننا كنا مرحلة فى حياته فهذه هى قمة الصدمة  
  • عندما نحترم مشاعر الاخرونضحى من أجله بكل ما هوغالى وثمين ثم لايقدر هو هذه التضحية ويعتبرها كانها فرض علينا كان لابد أن نقوم به فهذه هى قمة (الوجع)
  • عندما نعتقد أن هناك شخص واحد فى هذه الحياة يحبنا ولا يوجد سواه ولا نرى سواه وهو يرى أننا لسنا الوحيدين فى هذه الحياة الذين نحتاج لهذا الحب وأنه يوجد غيرنا كثيرين يستطيع أن يعطيهم حبه فهذه هى قمة(الظلم)
  • عندما نجلس فى ركن فى أخر الغرفة نبكى على حبيب رحل عنا ولم يقدر مدى حبنا له ونغلق كل الابواب فقط لنبكى على الاطلال ولم ندرك أن هناك قلوب حولنا تحبنا وأننابداخلنا الكثير الذى يعوضنا عن هذا الحبيب فهذه هى قمة (الحماقة)
  • عندما نعتقد أن نهاية الحياة فى رحيل حبيب أو شخص عزيز عنا ولا ندرك أن فى هذا الرحيل ربما حياة جديدة لنا ونغلق قلوبنا وعقولنا ونقول أن لاحياة بعد اليوم فهذه هى قمة(الوهم)
  • عندما نصرخ لشخص نحبه وهوه لا يسمعنا ولا يرانا ثم نقف أمامه بالساعات نصرخ ونتوسل اليه بالا يتركنا ويصمم هوه على الرحيل ونصرخ ونصرخ ونطلب منه الا يتركنا فهذه هى قمة(الذل)
  • عندما لانثق فى أنفسنا ولا فى قدراتنا ونستمد هذه الثقة من الاخرين الذين ليسوا مصدر ثقة فهذه هى قمة(المهذلة)
  • عندما نسيىء الاختيار ونبرر لأنفسنا أننا كنا على ثواب وأختياراتنا كانت صحيحة ونحن نعلم أن  اختياراتنا غير صحيحة وأنها كانت فى الوقت الخاطىء ولكن لا يوجد لدينا الشجاعة لكى نواجه أنفسنا فهذه هى قمة (الغباء)
  • عندما نتنازل أكثر من مرة عن حق من حقوقنا لعدم جرح الاخر ثم يعتقد هو أنه هو البطل وأنه على ثواب فيطلب تنازلات أكثر فنعطى له أكثرفهذه هى قمة (المأساة)
  • عندما يحولنا من نحبه الى صورة أو تمثال  صنعه بمواصفاته هو ونحن نقبل دون أى أعتراض ثم بعد أن يجعلنا مجرد مسخ لصورة هوه أرادها يمزق هذه الصورة ويحطم هذا التمثال لمجردأنه غير راضى عنه فهذه هى قمة (الاهانة)
  • ومازالت الكلمات التى لها معانى مستمرة وفى النهاية لا يصح الا الصحيح ونؤمن دائما بالقضاع والقدر وأن الحياة لا تقف بل مستمرة وستستمر ولكن عندما ندرك قيمة أنفسنا وقيمة من حولنا .          

الأربعاء، 28 يوليو 2010

بدرجة كام

النهاردةوأحنا قاعدين ساعة العصارى كدة كنا قاعدين قعدة أسرية لطيفة وده نادرا ما يحدث بهزر طبعا أننا حقا عائلة محترمة ............. المهم رن تليفون حمادة اخويا ورديت عليه بنوتة صوتها حلو قوى البنات اللى هما شاغلين فى خدمة العملاء دول اللى بيدلعوا وهما بيتكلموا وتحس يا اخويا ان البت شوية وحتوصفلك نفسها وشكلها وجسمها وهيه بتكلمك عارفنهم طبعا .....المهم حمادة قال :الو قالتله الوووو حضرتك الاستاذ احمد قالها ايوة مين قالتله احنا بنك اسكندرية كنا عاوزين ناخد من حضرتك شوية بيانات ممكن يا فندم؟حمادة اخويا فى حالة اسبهلال قالها طبعا اتفضلى وقعدت تساله :هوه حضرتك بتتعامل مع البنك من زمان؟حمادة :لا طب حضرتك راضى عن الخدمات البنك بدرجة كام؟حمادة بدرجة ستة من عشرة طب حضرتك راضى عن الخدمة الخاصة بكشف الحساب بتاع حضرتك بدرجة كام؟واسئلة كتير كلها تنتهى بدرجة كام ...... يس هوه الحقيقة الاخت الفاضلة كان ناقص سؤال واحد بس هوه حضرتك راضى عنى وعن أدائى بدرجة كام؟طبعا حمادة اخويا كان قاتح الاسبيكر ده يس عشان المدام بتاعته كانت جنبه قال يعنى الواد ميلتزم زى كل الرجالة طبعا المهم حمادة نهى المكالمة لأنه أتخنق بعد ما قفل أنا قعدت أفكر هما بتوع البنك دول فاضيين قوى كدة عشان يقعدوا يتصلوا ويقولوا أنت راضى عننا بدرجة كام؟يعنى هيه حتفرق مع البنك كتير اذا كنا راضين عنه ولا لأ حيزعل معاليه لو قولناله لا مش راضين حيضايق سياته وياخد على خاطره ويغير اسمه من بنك أسكندرية لبنك ست أبوها مثلا ثم أصلا احنا حيلتنا حاجة عشان نحطها فى بنك ونبقى عملاء فيه الله يجازى اللى نظفنا وخلى لا ورانا ولا قدمنا حاجة نحطها فى حصالة حتى مش بنك وبعدين أنا أسمع أن بنك أسكندرية ده مهدد بالافلاس يعنى معالى البنك المحترم خلص مشاكله كلها وناقص بس أنه يعرف أحنا راضين ولا مش راضين ........ طب لو احنا مش راضين حيلموا بعض فى البنك ويجوا كدة بربطة المعلم يقدموا فروض الولاء والطاعة لينا عشان نرضى عنهم ولا هما بيتصلوا عاملين بيزنس مثلا مع شركة الاتصالات اهم كل ما تتصل اكتر كل ما فرصتك فى الضرب على القفا تكتر.....بقت حاجة مستفزة جدا كل ما ترد على التليفون تلاقى يا أما شركة بتعرض عليك عرض عمرك طبعا بانك تشترى مش عارفة بتاع كدة وعليه هدية أو ياأما أستفتاء طب ما أحنا عارفين نتيجة الاستفتاءات فى بلدنا بتبقى بنسبة 99.9% يعنى نسبة الرضا أو عدم الرضا مش مهمة اصلا عند الحكومة ......يا بت يا بابوشة بلاش ييكلمى فى السياسة ما هما اللى غاظونى  اصل أنا متغاظة قوى من البنت اللى رديت أصل صوتها كان حلو قوى والله الواحد لما سمع صوتها بقى راضى كل الرضا مش على البنك بس لا على حياتنا كلها وحسيت كدة أن الحياة حلوة وماما حلوة ومصر حلوة وبخير ومفيش مشاكل خالص والحاجات بقت رخيصة والدنيا بقت عنب .....أنا بقى حسالكم سؤال هو أنتم راضين عن مرات أبوكم اللى هيه مصر بدرجة كام؟وأبقى سلملى على جوزك يا أسماعيل بيه

الثلاثاء، 27 يوليو 2010

أنا مين

مش عارفة أبدا منين انا حبدأ بجزء من أغنية بتقول سألت نفسى كتيرمرسيتش يوم على بر أنا اللى فيا الخير ولأ اللى فيا الشر ...هوه ده السؤال (انا مين؟)هوه انا فعلا حد كويس مبيغلطش وقلبى أبيض او أصفر أى لون من الفواتح يعنى ...ولأ أنا حد وحش وبغلط وقلبى عليه علبة بلوك أسود ومهبب .,,,أوقات بحس أنى طيوبة وكويسة وبنت حلال مصفى ومش بعمل حاجات غلط .......وأوقات بحس انى شرانية ونفسى أنط فى كرش أى حد يكلمنى .......والله يا اخونا أنا ببقى نازلة من بيتنا ومقررة أنى ابقى لطيفشة قصدى لطيفة ومزعلش حد منى ولا أزعل من حد ولا من سبت بس أعمل ايه بقى تنيا قصدى دنيا فى مواقف كتير بتضايق وبحاول البس المسك التمام وارسم الآبتسامة الهبلة على وشى قال يعنى الموقف منرفزنيش ولا غاظنى ولا حاجة ابدا بس مش بقدر الصراحة معلش احنا بشر ولينا طاقة ومش مركبين مرارة كاوتش يعنى ,,,,, اناساعات بغلط لدرجة انى ممكن أضيع حاجات حلوة منى بس يالا مش موضوعنا المهم انا ملقيتش اجابة هوه أنا ايه الخير ولا الشر ولا الاتنين ........وهوه ليه أحنا لينا أكتر من وش ......طب ليه لما واحدة من صاحباتى بتسالنى عن موضوع وبتاخد رايى فى مشكلة ممكن أكون انا بمر بنفس المشكلة ليه بقولها حل هايل جدا من وجهة نظرها بس أنا مقدرش أنفذ الحل ده .... يعنى مقدرش أطبق الحل ده على نفسى ,,,,, ببقى أنا كدة بوشين صح صح صح ما تردوا....نفسى لما حد يسالنى عن رايى فى مشكلة وأكون أنا متنيلة على عنيا فى نفس المشكلة متفلسفش بقى وأعمل سبع رجالة فى بعض ..... بس بلاقى كلنا كدة مش عارفين أحنا مين كويسين ولا وحشين يا ريت والنبى اللى يعرف يقولى علشان الموضوع عاملى روح معنوية وتعبلى نفسويتى ..... يرضيكم تبقى نفسويت بابوشة تعبانة مستنياكم تعلقوا على الموضوع عليا النعمة اللى ما حيعلق لعلقه







ا

الاثنين، 26 يوليو 2010

لقب عمتو

عايزة اكلمكم عن احساس جميل جدا انا ليا اخ واخد اسمه احمد وانا بعتبره حد مهم جدا فى حياتى هوه الحمدلله ربنا رزقه ببنت الحلال واتجوز وخلصنا منه لسه متجوز قريب من شهرين...الجميل بقى لما عرفت انه مراته حامل وانى كلها شهور وحاخد لقب عمتووووومش قادرة اقولكم انا فرحت قد ايه ومبسوطة قوى علشان اخويا حيبقى عنده بيبى ومستنية بفارغ الصبر اشوفه ومشتاقة جدا انى اشوف عيونه النونو والمس ايده الصغننة واخده جوه حضنى وقررت بينى وبين نفسى انه اول مايشرف اكون اول حد اشيله نفسى الايام تعدى بقى ويشرف سياته ...والله احساس جميل ويوم ما عرفت لاقيت دموعى نزلت منى يمكن عشان حسيت ان الواد حمادة كبر وحيبقى اب وحيرجع بقى من الشغل يا عينى شايل بطيخة ويقعد يغير للعيال الكفولةولما يخرج معاهم يقعد يلعن اسلاف اللى جبهم ههههههههه وطول ما هوه قاعد يفضل يقول عيب يا حبيبى ... خلى اخوك يلعب معاك ياولد يا واد يا ابن ال ....... هههههههه بس برغم كل ده احساس جميل ربنا يسعده ويهنيه وويكون سند ليه .. بقوله هوه ومراته حبيبتى بجد انا بحبها جدا وبعتبرها اختى اللى ربنا مقدرش مامتى تجيبها لكن عوضهالى فى مرات اخويا الف مبروووووووك وحابقى عمتوووو غصب عنكم

الأحد، 25 يوليو 2010

صاحبتى المتنازلة


النهاردة بقى ححكيلكم على واحدة صاحبتى حكايتها غريبة شوية هيه عايشة قصة حب جامدة جدا وانا أحساسى كدة بيقولى أنها عايشها من طرف تالت على رأى أحمد حلمى فى الفيلم حاسة ان اللى بتحبه ده مش حاسس بيها خالص كلمتنى فى يوم وهيه منهارة جدا ومقطعة نفسها من العياط وقالتلى انه قرر يسيبها الحكاية يا اخونا انها بتحب واحد وانه معذبها جدا دايما بيقولها كلام جارح جدا فى الاول بدا الموضوع متخرجيش متروحيش متلبسيش قال يعنى بيغير عليهاوبعد كدة بدات سلسلة التحكمات بقى مكنتش بتعمل حاجة الا باذنه كان حارمهامن كل حاجة يا عينى والصراحة هيه كمان قدمت تنازلات كتير قوى بتخاف على زعله بشكل غريب لما كان يزعل معاها كانت تجرى هيه وتصالحه وتفضل تكلمه وتتذلل ليه علشان يردعليها طبعاهيه كانت بتعمل ده بحب واخلاص لكن هوه مفهمش ده على انه حب هوه فاهمه على انه ضعف لحد ما وصل بيه الامر انه طلب منها انها تبعد عنه ومتكلمهوش ولانهاكانت مخلياه هوه محور حياتهاكانه مركز الكون والدنيا هيه اللى بدور حواليه دلوقتى هيه منهارةمش مصدقة انه جيه عليها اليوم اللى قالها فيه كلام جارح فى حد بيحب حد يقوله انت مش محترم ولا انتى انسانة مش كويسة بالذمة ده كان بيحبها يا جماعة حب ايه ده اللى يذل البنى ادام كدةالحقيقةهيه لما قالتلى الكلام ده الدم نط فى نفوخى وكان نفسى انطبق فى زمارة رقبته وطلعهاواقعد ازمر بيهاواتغظت منه جدا بس اتغظت من صاحبتى اكتر لانها مغفلة ايون مغفلة لانها كان لازم تفهم انها لما تقدم تنازلات هوه مش حيفهم انها حب ولانها محفظتش على كرامتها وعزة نفسها ومحدش يطلع بقى يتفلسف ويقولى الحب مفهوش كرامة وكلام الافلام ده دى قصة فى طرف محترمش مشاعر الطرف التانى ومحترمش اللى البت عملته علشانه بصراحة انا كنت قاسية معاها جدا بس اصل اكتشفت اننا بنضيع وقت طويل فى مواضيع فاشلة وبنكون وصلنا لمرحلةاستهلكنافيها كل مشاعرنا وطاقتنا ونقعد نعيط قال ايه اتصدمنا طب ما احنا كنا عارفين اننا مش فارقين مع الطرف التانى ومع ذلك قعدنا نقدم التنازلات اللى غاظنى كمان انها قالتلى انه هددها اكتر من مرة انه حيسبها وكل ده كان بيحصل على اسباب تافهةطب ليه كملتى يا بنتى اصلى بحبههههههههههه يا باباانا نصحتها بقى انها تكبر دماغها من الموضوع وتستعوض ربنافى السنين اللى فاتوا من عمرهاوتحسبن عليه وتكشف راسها ساعة مغربية كدة وتدعى عليه دعوة تجيب اجله ياريت ابقى ما نقدم تنازلات نشوف بعقلنا مش بقلبنا احنا بنقدمها لمين وهوه فعلا يستاهل مشاعرنا ولا لاء لان الولد لما يحس ان البنت ضعيفة وبتحبه بيستغل ضعفها ده وده اللى حصل مع صاحبتى منه لله وربنا يصبرها ياريت تقولولى رايكم فى الموضوع

الجمعة، 23 يوليو 2010

اعرفكم بيا

اعرفكم بيا انا بنت فى التلاتين من العمر زى اى بنت ليا طموحات وامنيات ونفسى اعمل حاجات كتير وكالعادة محققتش حاجة خالص اتخرجت من الكلية مش فاهمة حاجة زى اى حد بيتعلم فى بلدنا بنتخرج مش فاهمين حاجة ولحد دلوقتى نفسى افهم اى حاجة...................... قولولى هوه فى حد فاهم حاجة ؟ والنبى يا اخونا اللى فاهم يقولى ينوبكم ثواب وتقعدلك فى صحتك وعافيتك نرجع لموضوعنا انا زى ما قولت لحضراتكم أتخرجت من كلية الأداب ومكنش طموحى أشتغل فى الحكومة لكن أهوه اللى حصل بقى نعمل أيه وأشتغلت فى منطقة ارياف بعد كدى حكيلكم عن المغامرات اللى حصلتلى فى الشغل ......... انا بقالى ست سنين بشتغل فى نفس المكان ست سنين يا ناس يا هوه ولسه عايشة الحمد لله ...... ومتجوزتش طبعا زى بنات كتير قوى عايزة اخترع اختراع هوه ليه البنات حلوة قوى وبتشتغل وفى بنات فى مناصب كويسة بس متجوزتش هيه الرجالة اتعمت طب ما يعملوا حاجة يعنى يزودوا زراعة محصول الجزر مثلا اللى بيقوى النظر عشان الرجالة اللى انتسطت فى نظرها دى تشوف البنات دى ....... وبرده حابقى احكيلكم مغامراتى مع العرسان اللى اتقدمولى والله كلهم ولاد حلال المهم دى مجرد بطاقة تعارف ويارب اكون كنت خفيفة عليكم ولسه هوه انتم لسه شوفتوا حاجة ........سلام دلوقتى وشوفكم فى الرسالة الجاية لو عجبتكم شجعونى ......